Phile | BOJ | STEP |

FILEMON

Philemon

1 O Filemon, e Pol. E Kristus Yesus aqa wau tamo deqa jeu tamo naŋgi na e ojsib tonto talq endia waibeb unum. Aqo gago was Timoti wo anjam endi neŋgreŋyosim ni qa qariŋyonum. Ni gago Kristen was bole. Ni iga koba na wau qujai. 2 Aqo aiyel anjam endi ni qa ti gago jaja Apia qa ti Arkipus qa ti Kristen tamo uŋgasari kalil ino talq dia korooqnsib loueqnub qaji naŋgi qa ti qariŋyonum. Arkipus a iga ti koba na qoto tamo bulosim deqa iga siŋgila na Qotei aqa anjam dauryeqnum.

3 Gago Abu Qotei wo Tamo Koba Yesus Kristus wo naŋgi aiyel niŋgi qa are boleinjrimqa niŋgi lawo na soqniye.

Filemon aqa kumbra boledamu deqa Pol a tulaŋ areboleboleiyej

4 Bati e ijo Qotei pailyoqnsimqa e ni qa are qaloqnsim deqa e Qotei biŋiyeqnum. 5 Di kiyaqa? E ni qa anjam endegsi queqnum. Ni na Tamo Koba Yesus tulaŋ qalaqalaiyoqnsim a qa ino areqalo siŋgilateqnum. Osim ni na Qotei aqa segi tamo uŋgasari kalil naŋgi dego qalaqalainjreqnum. 6 Ni iga ti beterosim iga koba na Kristus qa gago areqalo siŋgilateqnum deqa e endegsi Qotei pailyeqnum, “O Abu, ni na iga aqaryaigimqa iga powo bole osim iŋgi bole bole Kristus na iga egeqnu qaji di geregere poigwas.” 7 Od, was, ni na Qotei aqa segi tamo uŋgasari kalil naŋgi tulaŋ qalaqalainjreqnum. Ino kumbra dena ni na naŋgo are tulaŋ siŋgilatetnjreqnum. E ino kumbra deqa qusim dena ijo are latetbqoqa e tulaŋ areboleboleibqo.

Pol na Filemon minjej, “Ni olo Onesimus osim qalaqalaiyime. Di kiyaqa? A ino Kristen was bole deqa.”

8 O Filemon, e ni kumbra bei yqajqa mermitqa ni que. E Kristus aqa ñam na ni siŋgila na mermqa kere. Ariya e ino kumbra bole qa qalieonum. 9 Deqa e ni anjam tulaŋ siŋgila na mermqasai. Aqo ombla qalaqalaiyo kumbra dauryeqnum deqa e ni lawo na anjam mermqai. E Pol. E Kristus Yesus aqa anjam marsim laqnum qaji tamo. E Kristus aqa wau di ojeqnum deqa jeu tamo naŋgi na e ojsib tonto talq endia waibeb unum. 10 E ino kaŋgal tamo Onesimus a qa are qalonum deqa e anjam endi ni mermqai. E tonto talq endia sonamqa Onesimus a ni uratmosiq ulaŋosiq Rom qureq bosiqa e itbej. E itbonaqa e Kristus aqa anjam minjnamqa a are bulyosiq Kristus qa aqa areqalo siŋgilatej. Deqa bini a ijo aŋgro bul unu. Deqa e ni mermqai, ni a kumbra bole yime. 11 A nami kaŋgal tamo bolesai soqnej. Deqa a ni qa wau bole yosaioqnej. Ariya bini a kaŋgal tamo bolequja. Deqa a ni qa wau bole yqa kere. A e qa dego wau bole yqa kere.

12 Ariya endego e a qariŋyonum a ni qa olo bqo. Deqa e a qa are ugeibqo. Di kiyaqa? E a tulaŋ qalaqalaiyeqnum deqa. 13 E Kristus aqa anjam bole qa waueqnum deqa e tonto talq endi unum. Ariya ijo are koba agiende. E na Onesimus minjitqa a e ombla tonto talq endia sqas. Onesimus a ino kaŋgal tamo deqa a na e aqaryaibosim Kristus aqa anjam bole qa wauoqnqom di ni na dego e aqaryaibobulqam. 14 Ariya ni na e odbosaiunum deqa e a qariŋyonum ni qa olo bqo. E endegsi are qalonum. Ni na e aqaryaibqa are soqnim ni ino segi areqalo na e odbosim aqaryaibe. E siŋgila na ni mermqasai.

15 Bole, Onesimus a bati truquyala ni uratmem. Deqa e are qalonum, Qotei na marnaqa Onesimus a ni uratmej. Yim ni na a olo osim niŋgi ombla bati gaigai sqajqa deqa. 16 Onesimus a kaŋgal tamo laŋaj ni degsi are qalaim. Bole, a ino kaŋgal tamo. Ariya bini a ino Kristen was dego. Deqa ni a tulaŋ qalaqalaiyoqne. E a unonum, a ijo Kristen was bole. Deqa e a tulaŋ qalaqalai-yeqnum. Ariya e qalieonum, ni a olo tulaŋ qalaqalaiyoqnqam. Kristus na aqa are bulyetej deqa a ino kaŋgal tamo boledamu sqas. Soqnim ni a unsim marqam, “Bole, a ijo Kristen was bole.” Osim ni a tulaŋ qalaqalaiyoqnqam.

17 Deqa e ni ombla Kristus aqa wau ojeqnum ni degsi unsimqa ariya ni na Onesimus a olo osim geregereiyoqne. Agi ni na e oqnsim geregereibeqnum dego kere. 18 Onesimus a une bei ni emej kio? A ino silali bei nami osiq olo ni emqajqa mermsiqa bunuqna ni olo emosai kio? Degamqa ni na merbimqa e kamba silali di keretsiy ni olo emqai. 19 E Pol. Anjam endi e ijo segi baŋ na neŋgreŋyonum. Ni na e merbimqa Onesimus a ino silali bei yaimej qaji di e na kamba olo ni emekritqai. Ariya ni que. Nami e Kristus aqa anjam ni mermonam qusim are bulyem. E ino qunuŋ qa aqaryaimem. Deqa e na ni endegsi mermqa kere, ni na kamba e olo aqaryaibe. Ariya e degsi ni mermqa uratonum. 20 O ijo was Filemon, ni que. Ni Tamo Koba Kristus aqa ñam na kumbra bole di e ebe. Aqo ombla Kristus aqa tamo unum deqa ni kumbra di yosim dena ijo are boletetbe.

21 E qalieonum. Ni ijo anjam endi sisiyosim dauryosim Onesimus gereiyqam. Osim ijo anjam endi buŋyosim olo Onesimus kumbra tulaŋ boledamu yqam. Utru deqa e anjam endi neŋgreŋyosim ni qa qariŋyonum. 22 Ijo anjam qujai bei agiende. E are qalonum, Qotei a nuŋgo pail qusim gam waqtetbimqa e niŋgi qa olo bqai. Deqa Filemon, ni ino talq di e ŋeiqajqa warum gereiyetbime.

Pol aqa wau qujai naŋgi na Filemon kaiyeiyeb

23 Aqo Epafras wo ombla tonto talq endia unum. A dego Kristus Yesus aqa wau tamo deqa jeu tamo naŋgi na a ojsib tonto talq endia waiyeb unu. A na ni kaiyeimqo. 24 Mak na Aristarkus na Demas na Luk na naŋgi qolqe dego ni kaiyeimonub. Naŋgi e koba na wau qujai.

25 Tamo Koba Yesus Kristus a niŋgi qa are boleiyosim nuŋgo qunuŋ geregere taqatoqneme.